Alty sany türki döwletiň - Türkmenistanyň, Azerbaýjanyň, Türkiýäniň, Özbegistanyň, Gazagystanyň we Gyrgyzystanyň çäginde "Molla Nasreddin - agyr günlerde dost" atly çeper filmiň surata düşürmek işleri geçiriler.
Film bu ýurtlaryň bilelikdäki taslamasy bolar we umumytürki gymmatlyklaryna, däplerine we gahrymanlaryna bagyşlanar diýip, Türkmenistan habarlar portaly Report agentligine salgylanyp habar berýär.
Filmiň režisýory bolup, belli azerbaýjanly kinematograf Wagif Mustafaýew çykyş eder. Ýurtlaryň her birinde belli aktýorlar çykyş eder. Surata düşürmek işleri awgust aýynda başlanyp, şu ýylyň ahyryna çenli tamamlanar.
Bellenilişi ýaly, TÜRKSOÝ tarapyndan prodýusserlik ediljek film, Kanndaky kino festiwalyna we beýleki abraýly halkara film görkezilişlerine hödürlener.
Türkmen jemgyýetinde Hoja Nasreddin "Ependi" ady bilen meşhurdyr. 2022-nji ýylda ÝUNESKO-nyň hökümetara komitetiniň Marokko Patyşalygynyň paýtagtynda geçirilen 17-nji mejlisinde kabul edilen karara laýyklykda, Türki dilli ýurtlarda meşhur bolan Hoja Nasreddin Ependiniň şorta sözlerini aýtmak däbi ÝUNESKO-nyň Adamzadyň maddy däl medeni mirasynyň sanawyna girizildi.
Belläp geçsek, Türkmenistan ýakynda Gündogaryň bu meşhur gahrymany barada öz filmini hem surata düşürdi. Onuň režisýory - Myrat Orazow boldy. Keşpleri Türkmenistanyň halk artistleri Çary Seýitliýew we Öwez Gelenow ýerine ýetirdi. Ependiniň keşbini Kemal Orazow janlandyrdy. "Türkmenfilm" birleşigi tarapyndan düşürilen "Ependi" filminiň şu ýylyň maý aýynda çykmagyna garaşylýar.
