Özbegistan dünýä bazarynda altynyň eksporty boýunça nobatdaky gezek lider boldy diýip, Daryo.uz ýazýar.
Altyn boýunça bütindünýä geňeşiniň (World Gold Council) habar bermegine görä, 2024-nji ýylyň mart aýynda Özbegistan altynyň 11 tonnasyny dünýä bazaryna çykaryp, Tailanddan (10 tonna) we Iordaniýadan (4 tonna) öňe geçdi.
2023-nji ýylyň netijeleri boýunça Özbegistan gymmat bahaly metalyň arassa satuwy boýunça diňe Gazagystandan yza galdy. Özbek altynyny esasy satyn alyjy ýurt Hytaý boldy, ondan soňra Polşa we Singapur gelýär.
Belläp geçsek, 2024-nji ýylyň 1-nji aprelindäki ýagdaýa görä, Özbegistanyň altyn-walýuta ätiýaçlyklarynyň möçberi 34,19 mlrd dollara ýetdi. Mart aýy boýunça bu görkeziji 1,99 milliard dollar artdy. Munuň özi ýylyň ilki iki aýynda gözegçilik edilen pese düşmäniň öwezini doldy.
