Internet blogeri sürüjisiz taksiniň “Stop” ýazgyly futbolkany görende ony hakyky ýol belgisi hökmünde kabul edip, ýalňyşyp biljekdigini görkezdi. Amerikaly bloger @jasonbcarr-yň şeýle nyşanly futbolkasynyň pilotsyz taksileri tormoz tutmaga mejbur edýändigini görkezýän wideosy sosial ulgamlarda meşhurlyk gazandy diýip, Mail.ru ýazýar.
Arizona ştatynyň Finiks şäherinde geçirilen synagda Waymo kompaniýasynyň sürüjisiz taksileri futbolkadaky bellige 4 gezegiň 3-sinde "tabyn boldy". Wideonyň awtory, köplenç, taksileriň garaňkyda galp belgä ähmiýet bermeýändigini, sebäbi futbolka basylan nyşanda garaňkylykda şöhleleniş elementleriniň ýokdugyny belleýär.
Blogçy bu hiläni gaýtalamazlyga çagyrýar, sebäbi bu ýollarda howply ýagdaýyň döremegine sebäp bolup biler.
Bu waka sürüjisiz awtoulaglaryň howpsuzlygy barada ikirjiňlenme döretdi. Hünärmenler şeýle “hokgalaryň” howply netijelere sebäp bolup biljekdigini bellediler. Mysal üçin, bir adam tizligi çäklendiriji belgili futbolka geýen bolsa, sürüjisiz taksi beýleki ýol hereketine gatnaşyjylardan has haýal hereket edip, päsgelçilik we çaknyşyk töwekgelçiligini döredip biler.
Bu sürüjisiz awtoulaglaryň daş-töweregini nädogry kabul etmeginiň ilkinji mysaly däldigini bellemelidiris. Şeýlelik bilen, 2020-nji ýylda awtoulaglary Burger King nyşanyny “Stop” belgisi bilen bulaşdyranlarynda, Tesla-nyň eýeleri kynçylyk bilen ýüzbe-ýüz boldular. 2021-nji ýylda ýene-de Tesla-nyň eýeleri awtoulaglarynyň Aýyň ýagtylygyny ýolyşygyň sary çyrasy hökmünde ýalňyş kabul edip, sürülmän saklanyp duran ýagdaýlaryny ýazga aldylar.
Sürüjisiz awtoulaglary döredijiler obýekti tanamak ulgamlaryny yzygiderli kämilleşdirýärler, ýöne şuňa meňzeş wakalar tehnologiýanyň heniz kämil däldigini görkezýär.
