ÝUNESKO Halkara binagärler birleşigi bilen bilelikde Barselonany 2026-njy ýylda dünýä binagärlik paýtagty hökmünde saýlady. Bu titul şäheriň binagärlik, şäher meýilnamalaşdyrylyş we durnukly ösüş gymmatlyklaryny öňe sürmäge meýilliligini ykrar edýär. Bu barada “Arch Daily” salgylanyp, life.liga.net habar berýär.
2026-njy ýylyň fewral aýyndaky Santa Eluàlia festiwalyndan başlap, 2026-njy ýylyň dekabr aýyndaky Santa Llucia festiwalyna çenli on aýyň dowamynda şäher jemgyýetçiligi çekmäge gönükdirilen birnäçe çäreleri geçirmegi meýilleşdirýär. Paýtagtda medeni taýdan ähmiýetli binalarda sergiler, ussatlyk sapaklary, konferensiýalar we açyk gapylar günleri geçiriler. Bu çärelere diňe ýerli däl, halkara guramalar hem goşulmaga çagyrylýar.
Meýilleşdirilen çäreleriň arasynda Bütindünýä binagärlik kongresi hem bar. Bu kongres meýilleşdirilen çäreler bilen bilelikde Barselonany öz şäher gurluşynda inklýuziwlik we durnuklylyk ýörelgelerini jemleýän şäher hökmünde görkezmegi maksat edinýär.
Mundan başga-da, açylyş we ýapylyş dabaralarynda tutuş şäher boýunça ÝUNESKO-nyň Bütindünýä mirasynyň obýektleriniň yşyklandyrylyşy meýilleşdirilýär.
Barselonanyň dünýä binagärlik paýtagty hökmünde şygary – “Bir şu gün, bir ertir”. Barselona Kopengagenden we Rio-de-Žaneýrodan soň dünýä binagärlik paýtagty derejesini göterýän üçünji şäher bolar.
Halkara binagärler birleşigi 1948-nji ýylda döredildi. Bu ÝUNESKO tarapyndan goldanylýan we hökümete degişli bolmadyk guramadyr. Onuň maksady durnukly geljegi emele getirmekde we global kynçylyklary çözmekde binagärligiň we şäher meýilnamalaşdyrylyşynyň ähmiýetini görkezmekden ybarat.
