Moskwada geçirilýän «Biz bilelikde. Sport» atly forumda Tatarystanyň sport ministri Wladimir Leonow BRIKS oýunlarynyň şekilini resmi taýdan tanyşdyrdy.
«Biz oýunlaryň şekilini saýladyk we oňa Briksik diýip at goýduk. Kazanda geçirilen Uniwersiadada Barsik bardy, bu oýunlarda Briksik bolar» diýip, TASS Wladimir Leonowyň sözlerini getirýär.
BRIKS dokuz ýurduň: Braziliýanyň, Russiýanyň, Hindistanyň, Hytaýyň, Günorta Afrika Respublikasynyň, BAE-niň, Eýranyň, Müsüriň we Efiopiýanyň döwletara birleşmesidir. BRIKS sport oýunlary şu ýylyň 12 – 23-nji iýuny aralygynda Kazanda geçiriler. Bäsleşige birleşmä agza ähli ýurtlardan türgenler geler. Umuman, çärä 50 dürli ýurtdan türgenler gatnaşar.
BRIKS guramasyna agza ýurtlardan gatnaşyjylaryň arasynda ilkinji ýaryş 2016-njy ýylda Hindistanda geçirildi (şol döwürde birleşmä diňe 5 ýurt agzady). Bäsleşikler her ýyl geçirilip başlandy we ikinji oýunlar Guançžouda geçirildi. BRIKS oýunlary 2019 – 2021-nji ýyllar aralygynda geçirilmedi. Şu güne çenli iň soňky ýaryş 2023-nji ýylda Günorta Afrika Respublikasynyň Durban şäherinde geçirildi.
