13-nji aprelde Las-Wegasda (ABŞ) geçiriljek PFL 2 ýaryşynyň çäklerinde garyşyk başa-baş söweşi söýüjileriň iň köp garaşýan tutluşyklarynyň biri bolar: MMA-nyň türkmen söweşijisi Döwletjan Ýagşymyradow Sloweniýadan Jeýkob Nedo bilen duşuşar.
34 ýaşly Ýagşymyradow söweşleri, köplenç, wagtyndan ir tamamlamaga mümkinçilik berýän güýçli urgy tehnikasy bilen bellidir. Ol 2018-nji ýylda ýarym agyr agramda ACB (häzir – ACA) çempiony boldy, guşagy iki gezek gorady, şondan soň 2020-nji ýylda Bellator-a geçdi.
2024-nji ýylyň başynda Bellator PFL ligasy tarapyndan resmi taýdan satyn alyndy. Indi bu liga UFC-niň esasy bäsdeşine öwrüldi.
Bellator-da Döwletjan ilkinji iki söweşinde ýeňildi, soň üç ýeňiş gazandy. Soňky söweşinde emin agzalarynyň biragyzdan karary bilen Maseý Rožanskini ýeňdi.
Ýagşymyradow karýerasynda 21 ýeňiş gazandy, ýedi ýeňlişe sezewar boldy, bir gezek söweş deňme-deň tamamlandy.
“Gorilla” lakamly 27 ýaşly sloweniýaly söweşiji Nedo PFL-de özüni tanadyp ýetişdi, onuň hasabynda sekiz ýeňiş (hemmesi wagtyndan ir) we bir ýeňliş bar, ol özüniň diňe ilkinji söweşinde ýeňildi. PFL-e 2023-nji ýylda geldi we şondan bäri üç ýeňiş gazandy. Nedo dekabr aýynda geçirilen soňky söweşinde Simeon Pauelli ikinji raundda nokauta gidirdi.
Söweşi nirede we haçan görmeli?
Ýaryş şenbe güni, 13-nji aprelde Aşgabat wagty bilen 03:30-da Las-Wegasdaky (Newada ştaty, ABŞ) “The Theater at Virgin Hotels” arenasynda başlar. Ýagşymyradow – Nedo söweşiniň Aşgabat wagty bilen 05:30 töweregi başlamagyna garaşmak bolar.
Ýaryşy tölegli ýazylyşyk bilen “Okko Sport” onlaýn serwisi doly görkezer.
