FIDЕ-niň ussatlygyna dalaşgär Aýdogdy Atabaýew Görüş ukyby pes küştçüleriň arasynda Bütindünýä küşt olimpiadasynda medal gazanan ilkinji türkmenistanly küştçi boldy.
Ol Serbiýanyň Wrnýaçka-Banýa şäherinde geçirilen 17-nji Olimpiadada bürünç medal gazandy. Bu ýaryş dört ýyldan bir gezek geçirilýär we ony Halkara Braýl küşt assosiasiýasy (IBCA) gurnaýar. Olimpiada Ýewropa, Aziýa we Günorta Amerikanyň güýçli ýygyndylary gatnaşýar. Şu ýyl ýeňiş ugrunda 22 ýygyndy bäsleşdi. Ýaryş FIDЕ-niň düzgünleri esasynda 9 tapgyrdan ybarat şweýsar ulgamynda geçirildi.
A.Atabaýew birinji tagtada çykyş edip, mümkin bolan 7 utukdan 6-syny toplady — 5 ýeňiş gazanyp, 2 oýny deňlikde tamamlady. Onuň ýaryşdaky netijesi 2353 boldy. Netijede, ol Polşadan Marçin Tazbiriň (2543) we Ispaniýadan Daniýel Pulwetiň (2467) yzysüre üçünji orny eýeledi.
Bürünç medala tarap ýolda Atabaýew Ukraina, Germaniýa, Fransiýa, Rumyniýa ýaly ýurtlaryň ady belli küştçülerini ýeňdi.
«IBCA-nyň 17-nji dünýä Olimpiadasy ýene bir gezek görüş ukyby çäklendirilen küştçüleriň ajaýyp zehinini, tutanýerliligini we sport ussatlygyny görkezdi» diýip, IBCA-nyň prezidenti Ýorgen Magnusson bäsleşikleriň netijesi boýunça belledi.
IBCA 1958-nji ýylda esaslandyryldy we ol Halkara küşt federasiýasyna (FIDЕ) hem-de Görüş ukyby çäklendirilenleriň halkara sport federasiýasyna (IBSA) agza bolup durýar.
