“Forbes” žurnalynyň hasaby boýunça, OpenAI kompaniýasynyň baş müdiri Sem Altman milliarder boldy. Ol reýtingde 2692-nji orny eýeledi. Bu barada gagadget.com habar berýär.
Žurnalyň maglumatlaryna görä, Altmanyň baýlygy onuň ýakynda IPO geçiren Reddit startapyna hem-de 65 mlrd dollar bilen bahalandyrylýan Stripe töleg kompaniýasyna maýa goýumlary bilen baglanyşyklydyr. Şeýle-de, milliarder ýadro energiýasyny öndüriji Helion kompaniýasy we Retro Biosciences startapy ýaly beýleki kärhanalara-da maýa goýdy.
Altmanyň baýlygynyň bahasy Kaliforniýadaky we Gawaýidäki emlägi hem öz içine alýar. Ol köpçülikleýin maglumatlara we “Forbes” tarapyndan geçirilen gözlegleriň netijelerine esaslanýar.
2022-nji ýylda ChatGPT çykandan soň emeli aňyň töweregindäki global gyzgalaňyň ýüzi bolan Sem Altmanyň OpenAI kompaniýasynda paýy ýok. Häzirki wagtda bu startap, takmynan, 80 mlrd dollar bilen bahalandyrylýar.
Mundan öň, geçen hepde “Forbes” milliarderleriň sanawyna 1,1 mlrd dollar baýlygy bilen aýdymçy Teýlor Swifti goşdy.
