Britaniýaly Rass Kuk GAR-daky Iňňe burnundan Tunisdäki Anjela burnuna çenli tutuş Afrikany ylgap geçen ilkinji adam boldy. 352 günüň dowamynda ol 16 ýurdy kesip geçip, 16 300 km ýol geçdi. Bu barada The Guardian habar berýär.
27 ýaşly marafonçynyň ýoly tropiki tokaýlaryň, dag gerişleriniň we Sahara çölüniň üstünden düşdi. Çölden ol gije geçdi. Maksada tarap ýolda Kuk dürli başdan geçirmelere sezewar boldy.
Angolada onuň toparyny taladylar, Kongoda ony ýerli ýaşaýjylar saklady, Nigeriýada marafonçy ýaramaz analizler we bil agyrysy sebäpli lukmanlara ýüz tutmaly boldy.
Marafon Kuka zyýanly endiklerden we humarly oýunlardan saplanmaga kömek etdi. Marafonyň dowamynda Kuk sosial ulgamlarda sahypa alyp bardy, bu ýerde ony müňlerçe adam goldady. Käbirleri hatda final tapgyrynda oňa goşuldylar.
Sosial ulgamlardaky işjeňlik Kuka haýyr-sahawat üçin 600 müň funt sterlingden gowrak (759 müň dollardan gowrak) ýygnamaga kömek etdi.
Ýeri gelende bellesek, Rass Kukuň üstünligini ykrar etmeýänler hem bar. Ýagny, World Runners Association Afrikadan geçen ilkinji adamyň 2010-njy ýylda daniýaly Ýesper Olsen bolandygyny öňe sürýär. Ýöne onuň ýoly iki esse gysga bolup, 434 gün wagt alypdy.
