Italiýanyň Umbriýa sebitinde Ýewropada iň beýik pyýada asma köprüsi açyldy. Bu barada “Corriere della Sera” habar berýär.
Köpriniň beýikligi 175 metr, uzynlygy bolsa 500 metrden gowrak. Ol orta asyrlaryň Sellano (Italiýanyň iň owadan obalarynyň sanawyna girýär) we Montezanto obalaryny birleşdirip, derýanyň we jülgäniň üstünden geçýär. Köpri arkaly gezelenç 30-45 minut wagt alýar. Köpri müň basgançakdan ybarat bolup, howpsuzlyk sebäpli myhmanlar ýörite tanap görnüşindäki ätiýaçlandyryş bilen bir basgançakdan beýlekä geçýärler. Mundan başga-da, olar ellik we kaska geýýärler. Syýahatçylar ýöremek üçin laýyk aýakgapda bolmaly.
Bir sagatda köprüden diňe 90 adam geçip bilýär. Sellanodan Montezano (ýa-da tersine) geçişiň bahasy 25 ýewro barabar. Iki tarapa syýahat 35 ýewro.
Köpriniň gurluşygy 1,5 mln ýewro düşdi. Köpri 2016-njy ýylda Italiýada bolup geçen birnäçe ýertitremäniň merkezinde bolan sebitde guruldy. Bu ýerdäki käbir obalar weýran boldy we ýaşaýjylar häzir hem öýlerine dolanyp bilmeýärler. Sellanonyň häkimi Attilio Gubbiotti asma köpriniň sebitde täze işewürligi ösdürmäge kömek etmegine umyt bildirýär.
