Hytaýyň Hebei Jianxin Flying Cars kompaniýasy Slowakiýanyň Klein Vision kompaniýasyndan AirCar uçýan awtomobilleriniň önümçiligine we ýaýradylmagyna ygtyýarnama aldy. Şertnamanyň bahasy aýan edilmeýär diýip, BBC salgylanyp, ixbt.com habar berýär.
AirCar dünýäde uçuşa ýaramlylyk şahadatnamasyny alan ilkinji awtomobildir. Ol BMW-niň içinden ýandyrylýan hereketlendirijisini ulanýar. Oňa uçmak we gonmak üçin uçuş-gonuş zolagy gerek. 2021-nji ýylda Slowakiýanyň iki howa menziliniň arasynda uçýan awtomobiliň synag uçuşy geçirildi. Uçuş 35 minut dowam etdi.
AirCar tizligini sagatda 300 km çenli artdyryp bilýär. Onuň uçuş aralygy 1000 kilometr, ýerde ýol ätiýajy 500 kilometrden gowrakdyr. Awtomobiliň uçara we ýene-de yzyna öwrülmegi 3 minut wagt alýar.
“Bu hyzmatdaşlyk dünýäde rewolýusion mobil çözgütlerimizi ýaýratmak we pudagyň ösüşine itergi bermek maksadymyzda möhüm ädimdir” diýip, Klein Vision-yň egindeş esaslandyryjysy Anton Zaýak belledi.
