30-njy martda Sian şäherinde (Hytaýyň Şansi welaýaty) Merkezi Aziýa – Hytaý görnüşindäki sekretariatyň açylyş dabarasy geçirildi. Bu barada Türkmenistan DIM-iň saýtynda habar berilýär.
Çärä Hytaýyň daşary işler ministriniň orunbasary Sun Weýdun, Merkezi Aziýa ýurtlarynyň diplomatik wekiliýetleriniň ýolbaşçylary, şeýle-de HBS-iň wekilleri gatnaşdy. Dabarada Türkmenistana ilçi Parahat Durdyýew wekilçilik etdi.
Sun Weýdun öz çykyşynda Merkezi Aziýa bilen Hytaýyň arasyndaky hyzmatdaşlygy ösdürmek üçin sekretariatyň döredilmeginiň ähmiýetini belledi. Şeýle-de, ol HHR-iň daşary işler ministriniň gutlag hatyny okady.
Sekretariaty döretmek baradaky ylalaşyk 2023-nji ýylyň maý aýynda geçirilen Merkezi Aziýa – Hytaý görnüşindäki döwlet Baştutanlarynyň birinji sammitinde gazanyldy.
Merkezi Aziýa ýurtlarynyň wekiliýetleriniň ýolbaşçylary öz çykyşlarynda sekretariatyň açylmagyny gutlap, hyzmatdaşlygy mundan beýläk-de pugtalandyrmaga taýýardyklaryny aýtdylar.
Türkmenistanyň daşary işler ministriniň hatynda Türkmenistanyň formata gatnaşýan ýurtlaryň arasyndaky gatnaşyklaryň giňeldilmegine we berkidilmegine uly goşant goşmaga taýýardygy bellenilýär.
Wagtlaýyn sekretariatyň ýerine ýetiriji müdiri U Insin boldy. Taraplaryň ylalaşygy boýunça birinji Baş sekretar Hytaýyň wekili bolar.
Şeýle-de, Türkmenistanyň wekiliýetiniň Siana saparyň dowamynda Şansi welaýatynyň ýolbaşçylary bilen birnäçe iş duşuşyklary geçirilip, ikitaraplaýyn gatnaşyklary mundan beýläk-de berkitmegiň ýollary ara alnyp maslahatlaşyldy.
