2024-nji ýylda “Älem gözeli” bäsleşigine gatnaşyjylaryň biri saud arabystanly model Rumi al-Kahtani bolar. Ol Meksikada geçiriljek bäsleşikde ilkinji gezek patyşalyga wekilçilik eder. Bu barada esquire.kz habar berýär.
27 ýaşly model eýýäm birnäçe gezek “Ýakyn Gündogaryň gözeli” we “Ýer gözeli” ýaly dürli gözellik bäsleşiklerinde Saud Arabystanyna wekilçilik etdi.
“Meniň üçin “Älem gözeli 2024” bäsleşigine gatnaşmak uly hormat. Men şeýle halkara derejesindäki bäsleşikde öz ýurdumyň ilkinji wekili boljakdygyma begenýärin. Ähli dostlaryma we ýakynlaryma goldawlary üçin minnetdar” – diýip, model sosial ulgamlarda ýazdy.
“Älem gözeli” her ýyl geçirilýän halkara we dünýäde iň abraýly gözellik bäsleşikleriniň biridir. 2002-nji ýylda oňa gatnaşmak üçin Hytaý we Albaniýa, 2004-nji ýylda Wýetnam, Gruziýa we Efiopiýa, 2005-nji ýylda Latwiýa, 2006-njy ýylda Gazagystan we 2007-nji ýylda Tanzaniýa goşuldy.
Geçen ýyl bäsleşige 90 ýurtdan gyzlar gatnaşdy. Şu ýyl hasap boýunça 73-nji “Älem gözeli” 28-nji sentýabrda Meksikada geçiriler.
