Floridanyň gubernatory Ron De Santis 14 ýaşa ýetmedik çagalaryň sosial ulgamlarda akkauntlarynyň bolmagyny gadagan edýän kanuna gol çekdi. Bu barada ixbt.com habar berýär.
HB 3 aňlatmasy bilen belli bolan kanunyň çäklerinde 14 ýaşa çenli çagalar indi hiç bir sosial ulgamda akkaunt açyp bilmezler. 14 – 16 ýaş aralygyndaky çagalar bolsa diňe ene-atalaryň rugsady bilen akkaunt açyp bilerler.
Kanunyň täsirine düşýän çagalaryň bar bolan akkauntlary bozular. Bu kanunda akkauntlary aýrylan çagalar üçin öwezini dolma mümkinçiligi hem göz öňünde tutulýar. Onuň möçberi 10 000 dollara ýetip biler.
De Santis öz kararyny sosial ulgamlaryň çagalara zyýan ýetirýändigi we kanunyň netijesinde ene-atalaryň çagalaryny goramak üçin goşmaça guralynyň boljakdygy bilen düşündirdi.
Kanun 2025-nji ýylyň 1-nji ýanwaryndan güýje girmeli. Dogrusy, eýýäm häzir onuň ABŞ-nyň Konstitusiýasyna girizilen Birinji üýtgetme bilen baglanyşykly çynlakaý meseleleri döretjekdigi çaklanylýar.
Mundan başga-da, Google, X, TikTok we beýleki kompaniýalar bilen baglanyşykly bolan NetChoice tehnologiýa topary kompaniýalardan kanuny berjaý etmek üçin talap edilýän maglumatlary ýygnama derejesiniň Floridanyň ýaşaýjylarynyň gizlinligini howp astyna goýup biljekdigini nygtaýar.
