Uber kompaniýasy 2025-nji ýylyň awgustyndan ABŞ-da zenan ýolagçylara aýal sürüjileri saýlamaga mümkinçilik berýän synag funksiýasyny işe girizer. Bu barada CNBC habar berýär.
Hyzmat Los-Anjeles, San-Fransisko we Detroýt şäherlerinde elýeterli bolar. Zenanlar programmada ugur sargyt edenlerinde, awtomobiliň ekonom, komfort ýa-da Black ýaly saýlanan kategoriýasyna garamazdan, öz isleglerini görkezip biler. Erkekler üçin bu funksiýa elýeterli däl.
Zenan sürüjiler hem zenan ýolagçylara hyzmat etmek isleýändigini görkezip biler. Uber saýlanandan soň zenan sürüjiniň geljekdigini kepillendirmeýändigini, ýöne saýlawyň netijesinde şeýle ähtimallygyň ep-esli ýokarlanýandygyny belleýär.
Kompaniýanyň aýtmagyna görä, täze funksiýa ýolagçylar hem-de zenan sürüjiler üçin howpsuzlygy we rahatlygy ýokarlandyrmaga gönükdirildi. Uber ozal şeýle mümkinçiligi Fransiýada, Germaniýada we Argentinada synap gördi.
2019-njy ýylda Uber şeýle hyzmaty Saud Arabystanynda – aýal-gyzlar sürmäge hukuk gazanandan soň girizdi. Soňra programma 40 töweregi ýurda ýaýradyldy.
Kompaniýanyň 2015-nji ýylda geçirilen içki pikir soraşmasyna görä, Uber-iň amerikan sürüjileriniň, takmynan, 20%-i ýa-da bäşden biri zenanlardy. Soňky ýyllarda platforma howpsuzlygy ýokarlandyrmak üçin birnäçe funksiýalary, şol sanda ýolagçylary barlamak üçin pin-kodlary we ýetginjekler üçin aýratyn akkauntlary girizdi.
