28-nji martda Aşgabatda Türkmenistanyň sungatda at gazanan işgäri Annabibi Islamowanyň 70 ýaş ýubileýine bagyşlanan haly önümleriniň sergisi geçiriler.
Türkmenistanyň Döwlet çeperçilik akademiýasynyň Sergiler jaýynda geçiriljek sergide ussat halypanyň elinden çykan dürli görnüşli haly önümleri görkeziler.
Türkmen haly sungatynyň ösüşine mynasyp goşandyny goşan Annabibi Islamowa dokmasynda gadymy haly nagyşlaryny ulanyp, häzirki zaman torbalarynyň dürli görnüşlerini her hili biçüwlerde ýerine ýetirýär. Olaryň çitiminiň syklygy, reňkleriniň ýitiligi haly önümlerini görenleri biparh goýmaz.
Sergide şeýle hem gadymy döwürlerde zat saklamak üçin we öýüň içiniň bezegi hökmünde ulanylan horjunlar, çeper dokalan nepis gapylyklar, iri zatlar salar ýaly uly haly torbalar, zenan torbalary, talyp gyzlar üçin torbajyklar, şeýle hem dürli reňkli we şekilli çagalar üçin torbajyklar görkeziler.
Ata-babalarymyzdan gelýän milli gymmatlyklarymyzyň, däp-dessurlarymyzyň nepis sungatda janlanmasyny görmek isleýänler üçin sergi 28-nji martda 16:00-da açylar.
Giriş hemmeler üçin açyk.
Habarlaşmak üçin:
+99363 37-15-51
