Şu ýylda Ahal welaýatynyň Bäherden etrabynda Bäherden sement zawodynyň ikinji tapgyry açylyp, ulanylmaga berler. Bu barada Prezident Serdar Berdimuhamedow Lebap sement zawodynyň ikinji tapgyrynyň açylyş dabarasynda eden çykyşynda belledi.
Täze, häzirki zaman innowasion tehnologiýalary bilen enjamlaşdyrylan Bäherden sement zawodynyň ikinji tapgyry ýylda 1 million tonna ýokary hilli sement önümini öndürer. Munuň özi diňe bir bu önüme bolan içerki zerurlyklary kanagatlandyrmak bilen çäklenmän, eýsem, onuň eksportyny hem artdyrar.
Sement gurluşyk üçin iň zerur önümleriň biri bolup durýar. Garaşsyzlyk ýyllarynda ýurdumyzda gurlup ulanmaga berlen Bäherden, Balkan we Lebap sement zawodlarynda täze innowasion tehnologiýalar esasynda dünýä standartlaryna doly laýyk gelýän ýokary hilli önümler öndürilýär. Häzirki wagtda «Türkmenistanda öndürildi» diýen ýazgyly sement önümleri diňe bir içerki bazarlarda däl, eýsem, dünýä bazarlarynda hem uly islege eýe bolýar.
