2024-nji ýylyň 11-nji martynda bitkoin ilkinji gezek bir teňňe üçin 71 müň dollardan geçip, taryhy öňegidişligi amala aşyrdy. Iň ýokary derejesinde (Aşgabat wagty bilen 15:10-da) kriptowalýutanyň hümmeti CoinBase biržasynda 71 859,97 dollara ýetdi.
Beýleki biržalarda hem şuňa meňzeş görkezijiler hasaba alyndy, bahalar 72 müň dollara golaýlady.
Soňky bir aýda bitkoin 48%-den gowrak gymmatlap, uly ösüşi görkezdi. Kriptowalýutanyň bazar bahasy 1,4 trln dollardan geçdi.
Bitkoinden başga-da, sanly aktiwleriň bazarynda umumy ösüş hasaba alynýar. Soňky ýedi günde ilkinji onluga girýän köp kriptowalýutalar kapitalizasiýasy boýunça 10-30% ýokarlandylar. Meşhurlygy boýunça ikinji kriptowalýuta Ethereum hem oňyn dinamikany görkezýär. Bir günde Ethereum-yň hümmeti tas 4% ýokarlanyp, bir teňňe üçin 4031 dollara ýetdi (iň ýokary derejesi 4049 dollar).
Hünärmenler bitkoiniň ösüşini üpjün edýän şertleriň arasynda esasy ikisini belleýärler.
- Indiki aýda garaşylýan bitkoiniň halwingi. Bu waka täze bitkoinleriň emissiýasynyň iki esse azalmagyna getirer, bu hem adatça, hümmetiň ýokarlanmagyna getirýär.
- Amerikanyň spot birža fondlaryna (ETF) serişdeleriň güýçli akymy. Bu fondlarda söwdalar 2024-nji ýylyň ýanwar aýynda başlady. Şeýlelikde, BlackRock kompaniýasynyň fondunda eýýäm 14 mlrd dollarlyk 200 müň bitkoin bar.
