20-nji fewralda amerikaly režissýor Martin Skorseze kinematografiýa goşan goşandy üçin Berlin film festiwalynyň hormatly baýragy gowşuryldy. Dabara Berlinale Palast festiwalynda geçirildi diýip, Kinometro.ru habar berýär.
“Henizem özümi kino düşüresim gelip duran ýaly duýýaryn. Ýene bir filmi surata düşürip, birnäçe ýyldan soň siziň bilen gaýtadan görşeris diýip umyt edýärin " – diýip, Skorseze sahnada durka mälim etdi.
Režissýora bu baýragy nemes kärdeşi Wim Wenders gowşurdy, ol Skorsezi “kinonyň häzirki şasy” diýip atlandyrdy.
Baýrak gowşurylyş dabarasy Leonardo di Kaprionyň, Mett Deýmonyň we Jek Nikolsonyň baş keşbi janlandyran “The Departed” jenaýat dramasynyň görkezilmegi bilen tamamlandy. Metriň bu işi 2007-nji ýylda iň gowy film ugry boýunça “Oskar”-a mynasyp bolupdy.
Mundan başga-da, Berlinale-de iňlis kinematografiýasynyň klassikleri Maýkl Pauell bilen Emerik Pressburger hakynda gürrüň berýän “Angliýada öndürilen: Pauelliň we Pressburgeriň filmleri” atly dokumental filmiň ilkinji görkezilişi bolar. Köplenç, olara, döreden kinostudiýasynyň adyna görä, "Arçerler" diýilýär. Skorseze bu taslamanyň prodýuseri bolup çykyş edýär, şeýle-de ol kadryň aňyrsynda sesli teksti hem okady.
