«Al-Nasr» klubunyň we Portugaliýanyň milli ýygyndysynyň hüjümçisi Kriştianu Ronaldu penaltileri hasaba almazdan, 714-nji goluny derwezä girizdi diýip, «MessivsRonaldo.app» habar berýär.
Bu üstünlik Saud Arabystanynyň çempionatynyň 20-nji tapgyrynda «Al-Fateh» bilen geçirilen duşuşygyň 17-nji minudynda gazanyldy – 39 ýaşly hüjümçi oýnuň hasabyny açdy. Bu görkezijä görä, Ronaldu penaltileri hasaba almazdan, 713 pökgi geçiren «Inter Maýaminiň» argentinaly hüjümçisi Lionel Messiden öňe geçdi.
Ronaldunyň professional karýerasynda jemi 1206 oýunda 875 gol saldy, Messiniň bolsa 1047 oýunda 821 pökgüsi bar.
Bu möwsümde Ronaldu ähli ýaryşlarda 27 oýna gatnaşyp, 25 pökgi geçirdi we 11 ýardam pasyny berdi.
Ronaldu «Altyn topuň» bäş gezek eýesidir. Karýerasynyň dowamynda ol Madridiň «Realynda» çykyş edip, klubuň taryhynda iň köp gol geçiren oýunçy boldy, şeýle hem «Mançester Ýunaýted», Turiniň «Ýuwentus» we Lissabonyň «Sporting» klublarynda oýnady.
