Garward uniwersiteti Kollej we uniwersitet işewürligi boýunça müdirleriň milli assosiasiýasy (National Association of College and University Business Officers) we Commonfund Institute guramasy tarapyndan düzülen ABŞ-nyň iň baý ýokary okuw mekdepleriniň reýtinginde birinji orny eýeledi. Bu barada TASS habar berýär.
Reýtingi hödürleýän “Forbes” žurnalynyň bellemegine görä, Garwardyň haýyr-yhsan gaznasynyň möçberi tas 49,5 mlrd dollar boldy. Ikinji orunda birneme tapawut bilen Tehas uniwersiteti ýerleşdi. Onuň gaznasynyň möçberi tas 45 mlrd dollara barabar. Şol bir wagtyň özünde, Garwardda Tehas uniwersitetine garanyňda, takmynan, 10 esse az talybyň okaýandygy bellenilýär.
Şeýle-de, iň baý ýokary okuw mekdepleriniň bäşligine Ýel ($40,7 mlrd), Stenford ($36,5 mlrd) we Prinston ($34,1 mlrd) uniwersitetleri girdi.
Bu reýting 1974-nji ýyldan bäri her ýyl düzülýär diýip, žurnal belleýär. Umuman alanyňda, reýtingde ABŞ-nyň 688 kolleji we uniwersiteti görkezilýär.
