Aşgabat şäheriniň Ýöriteleşdirilen küşt we şaşka mekdebiniň tälimçi-mugallymy Ahmet Ödäýewiň kapitan bolmagynda Aziýa-Afrikanyň topary Halkara gaýybana küşt federasiýasynyň (ICCF) howandarlygynda onlaýn görnüşde geçirilýän küşt boýunça 11-nji sebitara toparlaýyn çempionatda möhletinden ir ýeňiş gazandy. Bu barada “Neýtralnyý Türkmenistan” gazeti habar berýär.
Ýaryşa Braziliýa, Finlýandiýa, Russiýa, Hindistan, Argentina, Ispaniýa ýaly dünýäniň dürli ýurtlaryndan 16 topar gatnaşdy. Türkmenistanlylardan başga-da, Indoneziýadan, Marokkodan, Alžirden küştçüleri öz içine alýan Aziýa-Afrika topary ýekeje döwde-de utulman, jemi 67,5 utuk gazandy. Ahmet Ödäýew 7,5 utuk gazanyp, toparyň üstünligine öz goşandyny goşdy.
Çempionat bir ýyl dowam etdi, her gatnaşyja bir göçüm üçin bäş güne çenli wagt berildi. Bu küştçülere ýörite edebiýatlary we kompýuter programmalaryny ulanyp, öz döwlerini doly seljermäge mümkinçilik berdi. Ödäýew şeýle onlaýn çempionatlaryň küştçüleriň intellektual we seljeriş ukyplarynyň ösmegine ýardam edýändigini, sebäbi küşt oýnunyň ähli taraplaryny öwrenmäge we täze wariantlary ulanmaga mümkinçilik berýändigini belledi.
A.Ödäýew ICCF sportunyň ussadydyr. Ol küştçülere ulanmakda iň netijeli bolan 17-nji wersiýada “Chess base” küşt programmasyny maslahat berýär. Şeýle-de, ol iň täze habarlary we küşt ýaryşlarynyň wariantlaryny neşir edýän “New in Chess” žurnalyna ýüzlenmegi maslahat berýär. Ödäýewiň özi hem bu žurnalda birnäçe makalanyň awtorydyr.
Häzirki wagtda A.Ödäýew ýene birnäçe halkara onlaýn ýaryşlaryna, şol sanda 17-nji Aziýa-Afrika şahsy çempionatyna we 4-nji şahsy dünýä çempionatyna gatnaşýar. Birinji ýaryşda ol eýýäm ýeňşi kepillendirdi, ikinjide bolsa beýleki gatnaşyjylar bilen 6-9-njy orunlary paýlaşýar.
