“Türkmendeňizderýaýollary” agentliginiň hünärmenleri açyk deňizde ýangyn söndürmek boýunça üstünlikli okuw türgenleşik geçdiler. Agentlik adatdan daşary ýagdaýlarda dessine hereket etmekde ýokary derejede taýýarlygy görkezendigi üçin Balkan welaýatynyň häkimliginden hormat hatyna mynasyp boldy. Bu barada agentligiň metbugat gullugynda habar berilýär.
Türgenleşigiň çäginde açyk deňizde nebit we nebit önümlerini daşaýjy gämide nebit dökülip, ýangyn döreýär. Türkmenbaşy Halkara deňiz portunyň Gämi dolandyryş merkeziniň operatorlary hadysa baradaky habary kabul edip, Raýat goranyşyň we adatdan daşary ýagdaýlaryň gulluklaryna dessin habar berýärler.
Indiki tapgyrda ýangyny söndürmek we daşky gurşawa ýetýän zyýany peseltmek üçin çalt hereket güýçleri işe çekildi. “Ýyldyrym” ýangyn söndüriji gämisi ýangyny üstünlikli söndürdi. Soňra hünärmenler zyýanyň möçberini anykladylar we abatlaýyş hem dikeldiş işlerini geçirmek üçin zerur hasabatlary geçirdiler. Okuw türgenleşigi hünärmenleriň ussatlyk derejesini görkezdi. Açyk deňizde adatdan daşary ýagdaýlara şeýle taýýarlyk ýurduň söwda flotunyň ösýän we Hazarýaka döwletleri bilen söwdanyň artýan döwründe aýratyn möhümdir.
