29-njy ýanwarda Türkmenistanyň Özbegistandaky ilçisi Ş.Meredow Özbegistanyň Mirzo Ulugbek adyndaky milli uniwersitetiniň rektory Inom Majidow bilen duşuşdy. Bu barada Türkmenistanyň DIM-niň saýtynda habar berilýär.
Duşuşykda taraplar iki ýurduň ylym-bilim babatyndaky hyzmatdaşlygyny we ýokary okuw mekdepleriniň arasyndaky gatnaşyklaryny mundan beýläk-de pugtalandyrmak meselelerini ara alyp maslahatlaşdylar.
Taraplar Türkmenistanyň Prezidentiniň “Ýaşlar-Watanyň daýanjy” atly kitabynyň tanyşdyrylyş dabarasyny we Gündogaryň beýik akyldary we nusgawy şahyry Magtymguly Pyragynyň doglan gününiň 300 ýyllygy mynasybetli çäreleri geçirmek meselelesini hem aýratyn belläp geçdiler.
Duşuşygyň ahyrynda Türkmenistanyň ilçisi Ş.Meredow Türkmenistanyň Prezidentiniň “Ýaşlar - Watanyň daýanjy” atly ilkinji kitabyny Mirzo Ulugbek adyndaky milli uniwersitetiň rektoryna gowşurdy.
Uniwersitetiň saýtynda bellenilip geçilişi ýaly, bu uniwersitetde Magtymgulynyň ýubileýi mynasybetli halkara maslahatyny geçirmek, şeýle hem özbek filologiýasy fakultetinde şahyryň ömrüne we döredijiligine bagyşlanan mini-kitaphanany döretmek meýilleşdirilýär.
Mirzo Ulugbek adyndaky milli uniwersitet Merkezi Aziýada hereket edýän iň gadymy ýokary okuw mekdepleriniň biri hasaplanylýar.
Bellenilişi ýaly, bu günki gün, Özbegistanyň Milli uniwersitetiniň 13 sany fakultetinde Türkmenistandan 341 talyp bilim alýar.
