29-njy ýanwarda Türkmenistanyň Buharestdäki ilçihanasynyň binasynda Türkmenistanyň Prezidenti Serdar Berdimuhamedowyň "Ýaşlar - Watanyň daýanjy" kitabynyň tanyşdyrylyş dabarasy geçirildi. Çäre şeýle hem 2024-nji ýylyň ýurdumyzda "Pähim-paýhas ummany Magtymguly Pyragy" ýyly diýlip yglan edilmegine bagyşlandy diýip, Türkmenistanyň DIM-niň Metbugat gullugy habar berýär.
Çärä diplomatik wekilhananyň wekilleri we Rumyniýada bilim alýan türkmen talyplary gatnaşdylar.
Ýygnananlaryň öňünde çykyş etmek bilen, ilçi Türkmenistanyň Prezidentiniň kitabynda ýurdumyzyň ýaşlar syýasatynyň gazananlarynyň, şeýle hem döwlet durmuşynyň dürli ugurlarynda ýaş nesliň ornunyň we üstünlikleriniň beýan edilýändigini belledi.
Şeýle hem TÜRKSOÝ guramasy tarapyndan şu ýylyň Magtymguly Pyragy ýyly, Änew şäheriniň bolsa türki dünýäsiniň paýtagty diýlip yglan edilendigi nygtaldy.
