2024-nji ýylyň noýabr aýynda Londonda Elwis Presliniň gologrammaly tomaşasynyň ilkinji görkezilişi bolar. Euronews -yň habar bermegine görä, rok-n-rolyň şasy emeli aňyň kömegi bilen janlandyrylar.
Elvis Evolution şüweleňiniň guramaçysy bolup çykyş edýän Layered Reality kompaniýasy 1977-nji ýylda 42 ýaşynda aradan çykan meşhur aýdymçynyň hiç haçan görülmedik kadrlaryna elýeterlilik gazandy.
Şüweleňiň guramaçylarynyň atlandyryşy ýaly “konserte çuňňur berilmek tejribesi” üçin petekleriň bahasy 60 funt sterling töweregi bolar. Konsertden soň Londonda temaly bar hem-de janly aýdym-sazly we DJ-li restoran oturylyşygy bolar.
Soňra şular ýaly şüweleňleri Las-Wegasda, Tokioda we Berlinde geçirmek meýilleşdirilýär. Elwis Presliniň özi hiç wagt Amerikanyň Birleşen Ştatlarynyň daşynda konsert bermändi.
Guramaçylar ABBA toparynyň şowly geçen şuňa meňzeş tomaşasyndan soň Elwisi “janlandyrmak” pikiri bilen çykyş etdiler. Tomaşada toparyň agzalarynyň ýaşlygyndaky gologrammalary sahna çykarylypdy.
