«Disney Channel-yň» öňki ýyldyzy Selena Gomes ýene bir albom çykarmagy, ondan soň bolsa aýdym-sazdan bütinleý daşlaşmagy we diňe aktýorçylyk karýerasyna ünsi jemlemegi meýilleşdirýändigini aýtdy.
«Men ýadadym, indi dynç alasym gelýär» diýip, 31 ýaşly Gomes «SmartLess» podkastynyň 8-nji ýanwarda ýaýlyma beriljek bölüminde aýtdy.
Onuň bellemegine görä, ol elmydama aktrisa bolmak isleýärdi. «Men hiç wagt durmuşymy tutuşlygyna aýdymçylyk karýerasy bilen baglamak islemedim, ýöne bu güýmenjäm başga bir zada öwrülip gitdi. Men özümi iň ökde aýdymçy hasaplamok, ýöne hekaýalary beýan edip bilýärin we aýdym ýazmagy halaýaryn» diýip, Gomes aýtdy.
Alypbaryjylar Jeýson Beýtman, Şon Heýs we Will Arnett bilen söhbetdeşlikde aýdymçy, ilki bilen, aktýorlygy we aýdymy birleşdirmegiň özüne ýarandygyny gürrüň berdi. Ýöne soň aýdym aýtmak işi dolulygyna kinonyň ornuny tutdy. Bir syýahat konserti tamamlanmandygysaýy beýlekisi başlandy, albom yzyna albom çykardy. Şeýlelikde, ol «bir ýerde muny tamamlamak isleýändigine» düşündi.
