Aşgabatly 24 ýaşly zehinli küştçi Saparmyrat Atabaýew şu gün Özbegistanyň paýtagtynda tamamlanan «Rokirowka-2023 Masters» küşt festiwalynda ýeňiş gazanyp, Türkmenistandan onunjy grossmeýster boldy. Bu barada «Türkmenistan: Altyn asyr» elektron neşiri Türkmenistanyň Küşt federasiýasyna salgylanyp habar berdi.
9 tapgyrda Şweýsariýa sistemasy boýunça geçirilen Daşkent ýaryşyna 6 ýurtdan 62 küştçi – halkara grossmeýsterleriň üçüsi, halkara ussatlaryň bäşisi we FIDE-niň ussatlarynyň hem bäşisi gatnaşdy.
Altynjy tapgyrda esasy bäsdeşi – ABŞ-ly halkara grossmeýster Timur Gareýewden (Elo/FIDE görkezijisine 2570) üstün çykandan soň, Saparmyrat Atabaýew mümkin bolan alty utukdan 6 utuk gazanyp ýeke-täk lider boldy. Soňky üç oýunda ýene 1,5 utuk toplady we netijede ýaryşy 7,5 utuk bilen tamamlady. T.Gareýew bilen utugy deň bolsa-da, şahsy duşuşykda ýeňiş gazananlygy üçin S.Atabaýew birinji orny eýeledi. Täjigistanly halkara ussady Muhammet Husenhojaýew 7 utuk bilen bürünç medal gazandy.
Ýaryşdan öň Elo/FIDE görkezijisinde 2497-ä eýe bolan Saparmyrat Hindistanda geçirilen Aziýa çempionatynda we Eýranda hem-de Hytaýda geçirilen halkara ýaryşlarynda ýylyň dowamynda gazanan grossmeýsterlik üç bal gazanyp, 9 tapgyrda görkezijide ýene 7 punkt toplap, halkara grossmeýsteri derejesini almak üçin zerur 2500 baldan ýokary netijä ýetdi. Halkara Küşt federasiýasynyň geňeşiniň (FIDE) indiki mejlisinde bu çözgüt resmileşdiriler.
Netijede, Saparmyrat Atabaýew soňky iki ýylda Türkmenistandan üçünji grossmeýster boldy. Geçen ýyl Türkmenistanyň birnäçe gezek çempiony Meýlis Annaberdiýew ýurduň sekizinji grossmeýsteri boldy. Şu ýylyň başynda Saparmyradyň doganoglany Ýusup Atabaýew bu hormatly ada eýe boldy. Ondan öň, 2015-nji ýylda Saparmyradyň agasy Maksat Atabaýewe halkara grossmeýster derejesi berildi.
