Türkmen küştçüsi, FIDE ussady Läle Şöhradowa Italiýanyň Montesilwano şäherinde geçirilen 18 ýaşa çenli gyzlaryň arasyndaky dünýä çempionatynda ilkinji onluga goşuldy. Mümkin bolan 11 utukdan 7,5 utuk gazanyp, Läle 8-nji orny eýeledi we Elo reýtingini 180 punkt ýokarlandyrmagy başardy. Bu barada Orient habar berýär.
18 ýaşa çenli gyzlaryň arasyndaky kategoriýa 86 türgen gatnaşdy, altyn medala bolsa Azerbaýjandan türgen, FIDE ussady Aýýan Allahwerdiýewa eýe boldy.
Biziň türgenlerimiziň arasynda ikinji gowy netijäni Läläniň dogany, FIDE ussady adyna dalaşgär Leýla Şöhradowa görkezdi. Leýla 7 utuk bilen 12-nji orny eýeledi. Ol Elo reýtingini 165 punkt ýokarlandyrdy.
14 ýaşa çenli gyzlaryň arasyndaky kategoriýada çykyş eden üçünji türgenimiz Mähri Agamyradowa 125 gatnaşyjynyň arasynda 17-nji orny eýeläp, oňyn netijäni görkezdi. Mähri 7 utuk gazanyp, Elo reýtingini 130 punkt ýokarlandyrdy.
Türgenlerimiziň üçüsi-de dünýäniň iň güýçli küştçüleriniň ilkinji ýigrimiligine girdi we bu Türkmenistanda gyzlaryň arasynda küşt sportunyň kämilleşýändigini görkezýär.
Oglanlaryň arasynda 18 ýaşa çenli kategoriýada çykyş eden Amanmuhammet Hommadow hem üstünlikli netije görkezdi, ol 6 utuk gazanyp, Elo reýtingini 120 punkt ýokarlandyrdy.
Indi Amanmuhammet bilen Läle 20 ýaşa çenli ýaşlaryň arasynda Günbatar Aziýanyň çempionatyna taýýarlyk görýär.
Dünýä çempionatyna 92 ýurtdan 766 türgen gatnaşdy.
