Türkmenistanyň Fransiýadaky ilçisi we şol bir wagtyň özünde ýurduň ÝUNESKO-nyň ýanyndaky hemişelik wekili Maksat Çaryýew Parižde geçirilen Gidrologiýa maksatnamasy boýunça Hökümetara geňeşiniň 6-njy nobatdan daşary sessiýasynda çykyş etdi. Bu barada Orient habar berdi.
Sessiýanyň çäklerinde Halkara gidrologiýa maksatnamasynyň býurosynyň, şeýle-de onuň maliýe komitetiniň hem-de aragatnaşyk we maglumat-ündew işi boýunça komitetiniň ýolbaşçylarynyň saýlawlary üstünlikli geçirildi. Rezolýusiýalaryň redaksion komitetiniň meseleleri ara alnyp maslahatlaşyldy.
Çaryýew öz çykyşynda BMG-niň Baş Assambleýasy tarapyndan 2025-nji ýyldan başlap 21-nji marty Bütindünýä buzluklar güni diýip yglan edýän rezolýusiýanyň kabul edilmeginiň möhümdigini aýtdy. Bu çözgüt buzluklary gorap saklamak boýunça çäreleriň ähmiýetini görkezýär diýip, ilçi belledi.
Ýeri gelende bellesek, Türkmenistan 2021 – 2025-nji ýyllar üçin ÝUNESKO-nyň Halkara gidrologiýa maksatnamasynyň agzasydyr.
