Wise-premýer B.Annamämmedow Türkmenistanyň Prezidentiniň garamagyna täze Çagalar we ýetginjekler köşgüniň merkeziniň şekil taslamasyny hödürledi. Bu barada «Watan» habarlar gepleşiginde habar berildi.
Taslamada çagalar üçin sport we oýun meýdançalary, medeni çäreleri geçirmek üçin ýörite meýdançalar, amfiteatr, ýol hereketiniň düzgünlerini öwrenmek üçin meýdança we beýleki desgalar, şol sanda tehniki we hojalyk desgalary göz öňünde tutulýar.
Bellenilişi ýaly, ýaşlarymyzyň wagtlaryny gyzykly hem döredijilikli geçirmegi üçin ähli şertler döredilýär. Şu maksat bilen, paýtagtymyzda guruljak «Güneşli» Çagalar we ýetginjekler merkezi hem bagtyýar ýaşlarymyzyň ukyp-başarnygyny baýlaşdyrmakda, zehinlerini kämilleşdirmekde nusgalyk merkeze öwrülmelidir.
Döwlet Baştutany bu taslamany durmuşa geçirmäge jogapkärli çemeleşmegiň wajypdygyna ünsi çekip, wise-premýere döwrebap merkezi gurmak boýunça halkara bäsleşiginiň netijeli geçmegini üpjün etmek boýunça birnäçe anyk tabşyryklary berdi.
