Karaganda uniwersitetiniň arheologlary Gazagystanda skif-sak döwrüne degişli 3400 ýyllyk piramidany we Begazy-Dandybaý jemgyýetiniň gadymy şäheriniň galyndylaryny tapdylar. Bu barada «TRT Haber» habar berýär.
Piramida Karagandanyň Şet etrabynda ýerleşip, depäniň üstünde, Taldy derýasyna bakyp duran şekilde gurlupdyr. Radiouglerod barlagynyň netijelerine görä, ol b.e. öňki XIV-XII asyrlaryň arasynda gurlupdyr. Piramida birnäçe basgançakdan ybarat mawzoleýdir. Ony tapan arheologlar Andronowo medeniýetiniň Begazy-Dandybaý döwrüniň wekilleri tarapyndan Talda derýasynyň jülgesiniň aristokratiýanyň jaýlanylýan ýeri hökmünde ulanylandygyna ynanýarlar.
Bu sebitde geçirilen gazuw-agtaryş işleriniň netijesinde Begazy-Dandybaý jemgyýetine degişli gadymy şäheriň hem ýerleşendigi ýüze çykaryldy. 15 gektar meýdany eýeleýän bu şäherçe Kiçi Aziýada Troýa we Müsürde Orta Patyşalyk bilen bir taryhy döwürde ýaşapdyr. Şäherçede birnäçe diwarlar, köçeler we suw ýygnamak üçin niýetlenen ulgam tapyldy.
Alymlaryň pikiriçe, açyş Begazy-Dandybaý jemgyýetiniň Sibiriň günortasyndaky Karasuk medeniýetinden gelip çykan prototürk medeniýeti bilen ýakyn arabaglanyşygyň bardygyny tassyklaýar.
