A.S.Puşkin adyndaky Döwlet rus dili institutynyň Dil syýasaty we halkara bilim merkezi “Rus diliniň dünýädäki ornunyň görkezijisi” atly gözleginiň netijelerini beýan edýän makalany hödürledi we onda GDA ýurtlarynda rus diliniň ýagdaýy bilen baglanyşykly bolup geçýän prosesler jikme-jik görkezilýär diýip, Orient habar berýär.
Gözlegiň netijelerine görä, Türkmenistan medeni gurşawda rus dilini ulanmakda Arkalaşygyň beýleki döwletleri bilen deňeşdirilende öňdebaryjy orny eýeleýär. Bu görkeziji boýunça ýurt iň ýokary baly gazanan döwletleriň ilkinji toparyna goşuldy. Bellenilişi ýaly, rus diliniň kitaphana, teatr we muzeý işinde giňden ulanylmagy rus medeniýetini ösdürmekde möhüm rol oýnaýar.
Şeýle-de, Türkmenistan rus dilinde ylmy aragatnaşyk pudagyndaky görkezijilerini hem ýokarlandyrdy. “Türkmenistan dört punkt ýokary galyp, oňyn ösüşi görkezýär” diýlip, makalada bellenilýär. Ýeri gelende türkmen alymlarynyň we gözlegçileriniň köpüsiniň öz ylmy işlerini üç dilde – türkmen, rus we iňlis dillerinde neşir edýändigini bellemek gerek.
Häzirki wagtda ýurtda rus dilinde bilim alýan synplary bolan 70-den gowrak mekdep bar; ýurduň ähli bilim merkezlerinde, mekdeplerinde we ýokary okuw mekdeplerinde rus dili belli bir derejede öwrenmek üçin hökmany dil bolup durýar.
