Toyota ABŞ-da, Kanadada we Meksikada Highlander krossowerleriniň jemi 800 müňden gowragyny yzyna ýygnaýandygyny habar berdi.
Munuň sebäbi öňdäki bamperiň aşaky böleginiň ygtybarsyz berkidilmegi: ol hatda çalaja urga-da çydap bilmän, gaçyp biler (mysal üçin, ýoluň tekiz däl ýerinde) ýa-da adaty ulanyş wagtynda hem düşüp biler. Şu wagta çenli hiç kim bu kemçilikden ejir çekmedi, ýöne bamperiň hatda, bir bölegi hem ýokary tizlikde barýan awtoulagyň aşagyndan gaçsa, howply ýagdaýy döredip biljekdigi barada Toyota ýatladýar.
Agzalan kemçilik 2020-nji ýyldan 2023-nji ýyla çenli aralykda öndürilen Highlander-lerde tapyldy. Toyota kompaniýasynyň wekiliniň sözlerine görä, ABŞ-da 751 müň awtoulag, Kanadada we Meksikada bolsa 63 müň awtoulag yzyna çagyrylýar. Bu geçirilýän kampaniýanyň çäginde dilerler awtoulaglara üýtgedilen berkidijileri dakarlar.
