Wise-premýer, türkmen hökümetinde ykdysady, bank we halkara maliýe guramalaryna gözegçilik edýän Hojamyrat Geldimyradow Şanhaý Hyzmatdaşlyk Guramasyna (ŞHG) agza döwletleriň hökümet baştutanlarynyň Geňeşiniň mejlisinde Türkmenistana wekilçilik eder. Forum 26-njy oktýabrda Bişkekde geçiriler diýip, Gyrgyzystan Respublikasynyň Ministrler Kabinetiniň metbugat gullugyna salgylanyp, Orient habar berýär.
Bu çärä Belarusyň, Eýranyň, Gazagystanyň, HHR-iň, Mongoliýanyň, Russiýanyň, Täjigistanyň we Özbegistanyň hökümet baştutanlary, şeýle-de Hindistanyň we Pakistanyň Daşary işler ministrleri gatnaşar.
Şol gün, 26-njy oktýabrda Gyrgyzystanyň paýtagtynda GDA-nyň hökümet baştutanlarynyň Geňeşiniň we Ýewraziýa hökümetara geňeşiniň mejlisleri geçiriler. Bu iki forumyň işine ŞHG agza döwletleriň hökümet baştutanlarynyň Geňeşiniň wekilleri-de gatnaşar.
“Mejlisiň çäginde birleşikleriň gatnaşyjy döwletleriniň arasyndaky özara gatnaşyklar we hyzmatdaşlygy pugtalandyrmak meselelerine serediler we söwda-ykdysady hem medeni-ynsanperwer ugurlarda birnäçe resminama gol çekiler” – diýlip, Gyrgyzystanyň Ministrler Kabinetiniň metbugat relizinde aýdylýar.
