Garaşsyz Döwletleriň Arkalaşygynda “Parahatçylygy berkitmäge goşan goşandy üçin” medaly döredildi. Degişli karar 13-nji oktýabrda Bişkekde GDA-nyň döwlet baştutanlarynyň Geňeşiniň mejlisiniň gatnaşyjylary tarapyndan kabul edildi.
Medal GDA ýurtlarynyň raýatlarynyň, şeýle-de beýleki döwletleriň wekilleriniň aýratyn şahsy hyzmatlarynyň ykrar edilmegini görkezýän ýeke-täk döwletara tapawutlandyryş nyşany bolar. Ol halkara parahatçylygy we howpsuzlygy üpjün etmek, ýurtlaryň we halklaryň arasynda parahatçylygy gorap saklamaga, köptaraplaýyn hyzmatdaşlygy we dostlukly gatnaşyklary ösdürmäge gönükdirilen halkara çäreleri geçirmek boýunça işjeň işler üçin berler.
Baýrak halkara hyzmatdaşlygyň ösüşine, ylalaşdyryjy işleriň durmuşa geçirilmegine goşan şahsy goşandy, syýasy, medeni, sport, ynsanperwerlik çärelerini we parahatçylygy saklamaga, dostlukly gatnaşyklary ösdürmäge we ynsanperwerlik gymmatlyklaryny berkitmäge gönükdirilen çäreleri geçirmekde tapawutlanandygy, Arkalaşygyň gatnaşyjy döwletleriniň parahatçylykly ösüşini üpjün etmekde beýleki hyzmatlary we şahsy goşandy üçin berilýär.
Beýleki döwletleriň raýatlary parahatçylygy saklamak, ynsanperwerlik çärelerini geçirmäge ýardam etmek meseleleri boýunça GDA ýurtlary bilen özara gatnaşygy ösdürmekde goşan aýratyn şahsy goşandy, hyzmatdaşlygy ösdürendigi, ylalaşdyryjy, ynsanperwerlik, bilim, medeni we sport çärelerini taýýarlamaga we geçirmäge gatnaşandygy üçin sylaglanyp bilner.
“Parahatçylygy berkitmäge goşan goşandy üçin” medaly bilen sylaglamak baradaky teklip GDA-nyň gatnaşyjy döwletleriniň ygtyýarly edaralarynyň hödürlemegi boýunça amala aşyrylar. Sylaglanýanlaryň sanawy Arkalaşygyň ýurtlarynyň Goranmak ministrleriniň Geňeşi tarapyndan tassyklanar diýlip, GDA-nyň Ýerine ýetiriji komitetiniň metbugat gullugynyň habarynda aýdylýar.
