Türkmenistandan karateçi Baýry Baýryýew Hançžouda geçirilen XIX Aziýa oýunlarynda milli toparyň hasabyna ýene bir medal goşdy. Türgen 67 kg çenli agram kategoriýasynda bürünç baýraga mynasyp boldy. Özüniň ilkinji söweşinde Baýryýew Kuweýtden Fahed Alajmiden ýeňildi.
Ýöne soňky tutluşyklar Baýryýewiň tarapynda boldy. Ilkibaşda ol Butanyň wekili Rinçen Jamtşodan, soňra gyrgyzystanly Ulu Kalys Nurlanbekden, jemleýji söweşde bolsa Hytaý Taýbeýinden Çen Çung Şihudan üstün çykdy we şeýlelik bilen, ýaryşyň bürünç medalyna eýe boldy.
Öň, bürünç baýraklara dzýudoçy Maýsa Pardaýewa, boksçy Baýramdurdy Nurmuhammedow, erkin göreş pälwany Döwletmyrat Orazgylyjow, kuraş wekilleri Işanmyrat Ataýew we Aýnur Amanowa mynasyp boldy. Ýene bir kuraş ussady Tejen Tejenow milli topara kümüş medal getirdi.
