Habi Alonso 2024/25 möwsümden Ispaniýanyň “Real” (Madrid) futbol klubunyň baş tälimçisi wezipesine bellener. Bu barada Ispaniýanyň Marca gazeti habar berdi.
“Real”-yň häzirki baş tälimçisi italiýaly Karlo Ançelotti. Iýul aýynda Braziliýanyň futbol konfederasiýasynyň (CBF) başlygy Ednaldo Rodriges Ançelottiniň 2024-nji ýylda Braziliýanyň milli ýygyndysyna ýolbaşçylyk etjekdigini habar berdi.
Habi Alonso 41 ýaşynda, 2022-nji ýyldan bäri ol nemes “Baýer”-ine ýolbaşçylyk edýär. Alonso oýunçy hökmünde 2009-njy ýyldan 2014-nji ýyla çenli Madridiň “Real”-ynda oýnady we toparyň düzüminde Ispaniýanyň çempiony, iki gezek milli kubogyň eýesi, Çempionlar ligasynyň ýeňijisi we UEFA-nyň super kubogynyň eýesi boldy. Şeýle hem, futbolçy Ispaniýanyň “Real Sosyedad”-ynyň we “Eýbar”-ynyň, iňlis “Liwerpul”-ynyň we Germaniýanyň “Bawariýa”-synyň düzümlerinde-de oýnady. Ispaniýanyň milli ýygyndysynyň düzüminde ol dünýä çempionatynda we iki gezek Ýewropa çempionatynda ýeňiji boldy.
Ispaniýanyň çempionatynyň 6 oýnundan soň “Real” 15 utuk toplady we sanawda 3-nji ýeri eýeledi. 5 tapgyrdan soň 13 utuk toplan “Baýer” Germaniýanyň çempionatynda 2-nji ýerde durýar.
