Mercedes-Benz öz MBUX ses kömekçisine täze funksiýany goşýar. Tehnologiýa ulanyjylara ses arkaly hojalyk tehnikasyny we howpsuzlyk enjamlaryny dolandyrmaga mümkinçilik berýän akylly öý funksiýasyny aldy. Täze MBUX Voice Assistant akylly öý funksiýasy Philips Hue, Samsung SmartThings, TP-Link we Chamberlain Group-dan myQ tehnikasyny goldaýar diýip, tarantas.news habar berýär.
Ulanyjylar gurluşlary we enjamlary dolandyryp bilýärler. Mysal üçin, çyralary ýakyp bilýärler, intellektual rozetkany, termostatlary, hereket detektorlaryny we garaž derwezelerini dolandyryp bilýärler. Hyzmat ulanyjylara ýönekeý ses soragynyň kömegi bilen käbir hojalyk enjamlarynyň we ulgamlarynyň ýagdaýyny barlamaga-da mümkinçilik berýär. Ulanyjylar: “Salam, Mersedes. Öýde ähli zat ýerbe-ýermi?” – diýip, sorap bilýärler. Bu soraga ulgam, mysal üçin, şeýle jogap berip biler: “ähli penjireler ýapyk, ýatylýan otagda bolsa heniz çyra ýanýar”. Täze täzelenme bir wagtyň özünde dürli akylly öý ulgamlaryny birikdirmäge mümkinçilik berýär.
Ulanyjylar: “Eý, Mersedes, meniň akylly öý akkauntymy birikdir” diýmek bilen, awtomobil arkaly öz akylly öý akkauntlaryny birikdirip bilerler. Şol bir wagtyň özünde merkezi displeýde QR kody peýda bolýar we ulanyjylar smartfonlarynyň kömegi bilen ony skanirläp, prosesi optimizirläp bilýärler. Şeýle-de, ulanyjylar Mercedes me Connect ykjam goşundysy arkaly akkauntlary goşup bilerler.
Täze funksiýalar toplumy şu aý peýda bolar, Mercedes öz MBUX ulgamy üçin uly täzelenmäni çykarar. Belläp geçsek, Mercedes 2025-nji ýyla çenli MBUX ulgamynyň üçünji neslini taýýarlaýar.
