Türkmenistan Hytaýa turbogeçirijiler arkaly gaz eksport etmekde birinji orny saklaýar. Muny Hytaý Halk Respublikasynyň Baş gümrük edarasynyň maglumatlary delillendirýär diýip, Orient habar berýär.
Şu ýylyň ýanwar-awgust aýlarynda Türkmenistan Hytaýa umumy bahasy 6,63 mlrd dollar bolan tebigy gazy eksport etdi. Bu geçen ýylyň degişli döwri bilen deňeşdirilende 5% köpdür.
Hytaýa turbogeçirijiler arkaly tebigy gazy eksport etmek boýunça Russiýa ikinji orny eýeleýär. Ol geçen sekiz aýda Hytaýa 4,46 mlrd dollarlyk tebigy gaz iberdi, bu bolsa geçen ýyla garanyňda 86,4% köpdür. Bellenilen döwürde Mýanma Hytaýa gaz eksportyny 16,2% artdyrdy, umumy görkeziji 993,94 mln dollara deň boldy. Turbogeçirijiler arkaly Hytaýa tebigy gaz ibermekde Gazagystan degişli görkezijini 2,3% ýokarlandyryp, umumy bahasy 782,91 mln dollar bolan gaz eksport etdi. Özbegistan bolsa eksporty 40% ýokarlandyryp, 370,57 mln dollarlyk tebigy gaz iberdi.
