“Real” La Liganyň 5-nji tapgyrynda öz öýünde “Real Sosýedady” utdy – 2:1. Bu ýeňiş Madridiň toparynyň başynda Karlo Ançelotti üçin 173-nji boldy. Ol Zinedin Zidandan öňe geçdi we indi klubuň taryhynda ýeňiş sany boýunça ikinji orny eýeleýär diýip, madridlileriň resmi saýty habar berýär. Muny championat.com ýetirýär. Rekord 357 ýeňiş gazanan Migel Munýosa degişlidir.
Ançelotti La Ligada 112, Çempionlar ligasynda 36, Ispaniýanyň Kubogynda 17, Klublaýyn DÇ-de dört, Ýewropanyň Super kubogynda iki we Ispaniýanyň Super kubogynda iki oýunda ýeňiş gazandy. “Real” 64 ýaşly italiýaly hünärmen bilen 10 titula eýe boldy – iki Çempionlar ligasynyň, iki Klublaýyn dünýä çempionatynyň, iki Ýewropanyň Super kubogynyň, iki Ispaniýanyň kubogynyň, bir La Liganyň we bir Ispaniýanyň Super kubogynyň tituly.
Karlo Ançelotti 2024-nji ýylda Braziliýanyň milli ýygyndysyna ýolbaşçylyk eder. Öň, bu barada Braziliýanyň futbol konfederasiýasynyň başlygy Ednaldu Rodriges habar berdi.
