Sankt-Peterburg şäheriniň gubernatory Aleksandr Beglowyň ýolbaşçylygyndaky wekiliýet Arkadag şäherine aýlanyp gördüler. Myhmanlar elektrobusda täze şäheriň medeni-durmuş maksatly desgalary, ýaşaýyş jaýlary bilen tanyşdylar.
Saparyň çäklerinde myhmanlar Döwletmämmet Azady adyndaky Arkadag şäher döwlet kitaphanasyna bardylar. Russiýaly myhmanlar bu ýerde Gurbanguly Berdimuhamedowyň ýazan kitaplary, Magtymgulynyň goşgular ýygyndysy, çagalar üçin niýetlenen bölüm bilen tanyşdylar. Olara asman jisimlerine gözegçilik etmek üçin niýetlenen obserwatoriýa hem görkezildi. Bu ýerde myhmana “Arkadag şäheri — geljegiň şäheri” atly kitap sowgat berildi.
Täze şähere gezelenjiň çäklerinde russiýaly wekiliýet Arkadag şäher döwlet ätiýaçlandyryş müdirliginiň hünärmeni Kerwen Durdygulyýewiň öýlerine myhmançylyga bardylar. Ol ýerde “akylly” öýlerde döredilen şertler we mümkinçilikler bilen giňden tanyşdylar.
Arkadag şäheriniň gözel künjekleri bilen tanyşlygyň barşynda, myhmanlar ýaşaýyş jaýynyň ýanyndaky 250 adama niýetlenen sadaka jaýy we “Nesip” söwda merkezi, onda türkmen telekeçileriniň öndüren ýokary hilli önümleri bilen hem tanyşdylar. Gezelenç Arkadag şäheriniň Görogly adyndaky döwlet atçylyk sirkine baryp görmek bilen jemlendi.
