Apple özüniň iň gymmat we tehnologiki planşeti iPad Pro-nyň täzelenmesiniň üstünde işleýär. Bu barada Bloomberg-iň žurnalisti Mark Gurman habar berdi diýip, forbes.kz belleýär. Onuň maglumatlaryna görä, täze planşetleri 2024-nji ýylda çykarmak meýilleşdirilýär we bu ýazdan ýa-da tomusdan ir bolmaz diýip, Gurman ýazýar.
Täzelenme alty ýylyň içinde – 2018-nji ýyldan, ýagny iPad Pro-nyň ýüz tarapynda “Öýe” düwmesi bolmadyk täze dizaýna eýe bolanyndan bäri ilkinji uly täzelenme bolar. Şondan bäri planşete täze prosessorlar, kameralar, ekran tehnologiýalary we sensorlar goşuldy, ýöne düýpli üýtgeşmeler bolmady. Gurman täze planşetleriň M3 prosessorlaryna (Apple olary heniz görkezmedi) hem-de OLED-ekranlaryna eýe bolup biljekdigini ýazýar. Täze modelleriň ekranynyň diagonaly 11 we 13 dýuým bolar, häzirki wagtda iň uly modeliň ekranynyň diagonaly 12,9 dýuýma barabar.
iPad üçin gurluşy noutbuk ýaly ulanmaga mümkinçilik berýän Magic Keyboard klawiaturasy hem täzelener: aýratynam, taçpad – kursory dolandyrmak üçin panel uly bolar. Magic Keyboard-yň häzirki wersiýasy 2020-nji ýylda peýda boldy.
Gurman täze modeller soňky döwürde pese gaçýan iPad satuwyna itergi berer diýip hasaplaýar. Planşet satuwynyň pese gaçyşy Samsung we Lenovo ýaly beýleki kompaniýalarda hem hasaba alynýar. Häzirki wagtda iPad Apple kompaniýasyna esasy segmentleriniň arasynda iň az girdeji getirýär.
Täze iPhone smartfonlarynyň we Apple Watch sagatlarynyň tanyşdyrylyşy 2023-nji ýylyň 12-nji sentýabryna meýilleşdirilýär diýip, Gurman belleýär. Garaşylyşy ýaly, Apple täze iPhone 15 we 15 Pro modellerini görkezer. Olar üçin deslapky sargytlar 15-nji sentýabrda, satuw bolsa 22-nji sentýabrda başlap biler. Bloomberg oktýabr aýynda hem kompaniýanyň M3 prosessorynda işleýän Mac kompýuterlerini çykaryp biljekdigini ýazýar.
