Ýaponiýanyň SLIM atly ilkinji Aý gözleg modulyny ýokary çykarmaly H2A raketa göterijisiniň goýberiljek senesi 26-njy awgustdan 27-nji awgusta geçirildi. Bu barada Mitsubishi Heavy Industries kompaniýasy yglan etdi.
Meýilnamanyň üýtgemeginiň sebäbiniň günorta-günbatar Kagosima prefekturasyndaky Tanegasima kosmos merkeziniň golaýynda howa şertleriniň ýaramazlygy bilen baglydygy bellendi. Ikinji gezek yza süýşürilen halatynda uçuş 28-nji awgustdan 15-nji sentýabr aralygynda amala aşyp biler.
Beýikligi 2,4 m we agramy 200 kg bu enjam ýüz keşbi tanamak ulgamlarynda peýdalanylýan tehnologiýalary ulanyp, Aýyň kraterlerini we topografiýasyny öwrenmek üçin niýetlenendir. Şeýle hem SLIM Aýyň üstündäki gaýalardan tapylan demriň we beýleki elementleriň mukdaryny ölçäp bilýän ýörite kamera bilen enjamlaşdyrylandyr.
Ilkibaşda moduly Aýa maýda ibermek meýilleşdirilipdi, ýöne möhlet H3 agyr kysymly ýapon raketa-göterijisiniň goýberilişiniň şowsuz tamamlanmagy sebäpli, yza süýşürilipdi. Bu tabşyryk üstünlikli bolan ýagdaýynda Ýaponiýa öz modulyny Ýeriň tebigy hemrasyna ýerleşdiren dünýäde bäşinji ýurt bolar. Ondan öň ABŞ, SSSR, Hytaý we Hindistan bu babatda üstünlik gazanypdy.
