«Mercedes-Benz» kompaniýasy «AMG GT Coupe» sport awtoulagynyň ikinji neslini tanyşdyrdy. Awtoulag «V8» hereketlendirijisi bilen enjamlaşdyrylandyr diýip, kompaniýanyň metbugat gullugy habar berdi.
Täze ulag «SL» rodsteriniň platformasy, boýy 150 santimetre çenli ýolagçylar üçin iki orunlyk ikinji hatar oturgyçlar we 4,0 litrlik «V8» biturbo hereketlendirijisi bilen üpjün edildi.
Satuwlar başlananda ulag iki görnüşde – «GT 63» we «GT 55» kysymlarynda hödürlener. Birinjisiniň kuwwaty 585 at güýjüne (800 Nm) deň bolar we 100 km/sag tizlige 3,2 sekundda çykmaga mümkinçilik berer. Ikinjisiniň hereketlendirijisi 476 at güýjünde bolar (700 Nm), 100 km/sag-a çenli tizlenmek üçin awtoulaga 3,9 sekund gerek bolar. Iň güýçli nusgasy sagatda 315 km tizlige ýetmäge ukyply bolar.
Ulagyň hereketlendirijisi 9 basgançakly «awtomat» bilen işleýär, herekete getiriji ulgam düşýän agramy ähli oklaryň arasynda deň paýlamaga ýa-da ähli güýji diňe yzky tigirlere geçirmäge ukyplydyr. Awtoulag 12 dýuýmlyk multimediýa-ulgam ekrany, aýlawlarda dolandyrylýan yzky tekerler, kompozit tormozlar, işjeň aerodinamika ulgamy, şeýle hem 20 we 21 dýuýmlyk diskler bilen üpjün edilendir.
