Russiýanyň Ylymlar akademiýasynyň Kosmos barlaglary institutynyň hünärmenleri telemetriýany we «Luna-25» stansiýasynyň ylmy gurallaryndan alnan maglumatlary seljerdiler we STS-L bort telewideniýesiniň kameralaryndan ilkinji suratlary alyp bildiler.
Suratlarda Ýeriň we Aýyň fonunda enjamyň gurluş elementleri görünýär. Üçünji suratda missiýanyň nyşanyny we bortdaky manipulýator susagyny görmek bolýar.
Suratlar 13-nji awgustda - stansiýanyň gurallary birnäçe minutlyk işlände düşürildi. "Luna-25" şol wagt Ýerden 310 müň km uzaklykda ýerleşýärdi. Ähli gurallar doly işleýändigini we Aýdaky barlaglara taýýardygyny görkezdi. Olaryň analog we sanly merkezleridir bloklary örän oňat işledi diýip, Roskosmosda aýdýarlar.
Düýn “Luna-25” ikinji gezek Aýa uçuş traýektoriýasyny düzetdi. Bu amal bolmalysy ýaly geçirildi. Stansiýanyň hereketlendiriji ulgamy aşgabat wagty bilen 08:40-da herekete geldi we 24,3 sekunt işledi. “Luna-25”-iň ulgamlarynyň hemmesiniň kadaly işleýändigini, stansiýa bilen aragatnaşygyň durnuklydygyny aýdyp, “Roskosmos”-dakylar sözleriniň üstüni ýetirdiler.
"Luna-25" awtomat stansiýasyny 100 km beýiklikdäki Aý orbitasynda işe girizmek we 21-nji awgustda Boguslawskiý krateriniň demirgazygynda (ellipsiň merkezi koordinatlary günorta giňligiň 69,5450 gradusynda we gündogar uzaklygyň 43,5440 gradusynda) gondurmak meýilleşdirilýär.
