Gazagystanyň L.N.Gumilýow adyndaky Ýewraziýa milli uniwersitetiniň alymlary Kyrykungir arheologik zolagynda adaty bolmadyk daşdan salnan desgany tapdylar. Hünärmenler onuň ýaşynyň 4 müň ýyldygyny belleýärler.
Kyrykungirde gazuw-agtaryş işleri 2014-nji ýylda başlandy. Ol bir inedördül kilometr meýdanda ýerleşip, bürünç eýýamynyň, sak, hun-sarmat we türki halklaryň taryhy döwürlerini özünde jemleýär. Bu ýerde 100 sany ýadygärlik hasaba alyndy.
Täze ýüze çykarylan desga ozalky tapylanlardan (gorganlardan) düýbünden tapawutlanýar. Ol her tarapy 13 metre golaý bolan 6 taraply binadyr. Şeýle häsiýetli desgalara Aziýanyň sähralyklarynda ozal duş gelinmändi. Alymlar ony özboluşly «piramida» diýip atlandyrdylar. Desganyň örän takyklyk bilen gurlandygy bellenilýär.
Daşdan diwarlaryň ýüzi dürli haýwanlaryň, esasan hem atyň şekili bilen bezelipdir. Sähralykdaky «piramidanyň» içinde alymlar köp sanly keramika önümlerini, şeýle hem altyn şaý-sepleri tapdylar. Şeýlelikde, bu desganyň dini dessurlar üçin niýetlenendigi çaklanylýar.
