Erkin göreş boýunça türkmenistanly türgen Zyýamuhammet Saparow Belarusda geçirilýän GDA ýurtlarynyň II oýunlarynyň bürünç medalyny aldy.
Türgen 125 kg çenli agram derejesinde bürünç medal gazandy. Üçünji orun üçin tutluşykda Z.Saparow azerbaýjanly göreşiji Aslan Abakarowdan üstün çykdy diýip, Türkmenistanyň göreş federasiýasynyň metbugat gullugy habar berýär.
Beýleki bürünç medaly gazagystanly Omarhan Nadirow eýeledi. Bu agram derejede altyn medaly Russiýadan Alen Hubulow belarusly Alekseý Parhomenkodan üstün çykyp gazandy.
Belläp geçsek, şu ýylyň iýunynda Bişkekde geçirilen Aziýa çempionatynda Zyýamuhammet Saparow altyn medal gazandy.
Bu netije bilen Türkmenistanyň milli ýygyndysy GDA ýurtlarynyň II oýunlarynyň umumy medal sanawynda ýedinji orunda ýerleşdi. Türkmen türgenlerinde 9 medal bar (üç kümüş we alty bürünç medal).
