Russiýanyň Antraktidadaky «Wostok» stansiýasynyň alymlary bu ýerde garpyz ösdürip ýetişdirdiler – iki sany tohumdan jemi 8 sany bişen garpyz alyndy. Olaryň ýeten iň uly agramy 1 kg, diametri bolsa 13 sm diýip, «mail.ru» «Wostok» stansiýasyndaky Arktika we Antarktida ylmy-barlag institutynyň baş geofizigi Andreý Teplýakowyň beren maglumatlaryna salgylanyp habar berýär.
Bellenilmegine görä, alymlar tozanlandyrmagyň emeli usulyndan peýdalanypdyrlar. Emeli tozanlandyrmagyň döredýän kynçylygy diňe bir mör-möjekleriň hereketlerini emeli ýerine ýetirmekde däl-de, eýsem, garpyzyň gülleýän wagtyny kesgitlemekde hem ýüze çykýar. Garpyzyň güli bary-ýogy iki günlük açylýar, şunda erkek jynsly we aýal jynsly gülleriň deň açylmagy gerek. Şeýle hem tozanlandyrma diňe bir tohumyň çäklerinde geçirilmeli.
Apreliň ahyrynda ösümlikleriň ösmegi üçin amatsyz şertlerde – pes atmosfera basyşynda hem-de kislorod ýetmezçiliginde uýgunlaşmagyň usullaryny we bu ýagdaýlaryň tagamyna täsirini synag etmek üçin garpyzyň iki sany çalt ösýän tohumy ekildi. Garpyzlaryň ösmegi üçin ýörite toplum döredilip, zerur şertler, ýagny topragyň ornuny tutujy, iýmitlendiriji dökünler, yşyklandyryş bilen üpjün edildi. Maýyň aýagynda tozanlandyrma işi geçirilip, iýul aýynda ilkinji hasyl alyndy.
