Daşary ýurt raýatlary üçin bir bitewi elektron wiza Russiýada 1-nji awgustda sagat 12:00-da (Aşg wagt) işläp başlar. Bu barada Russiýanyň Daşary işler ministrliginiň konsullyk bölüminiň Telegram kanalynda çap edilen habarda aýdylýar.
Habarda bellenip geçilişi ýaly, wizany elektronic-visa.kdmid.ru web sahypasynda resmileşdirip bolar. Resurs eýýäm hyzmatyň işläp başlajak wagtyna çenli galan sekundlary sanap başlady. Resursyň baş sahypasynda: "Bir bitewi elektron wiza 2023-nji ýylyň 1-nji awgustynda Moskwa wagty bilen sagat 10:00-da işläp başlar" diýilýär.
Russiýa Federasiýasynyň Ykdysady Ösüş ministrliginde bellenip geçilişi ýaly, wiza bermeklik ýüz tutulan seneden başlap alty senenama gününiň dowamynda amala aşyrylar. Russiýanyň Daşary işler ministrliginiň konsullyk bölüminiň müdiri Alekseý Klimow daşary ýurtlular üçin giriş rugsadynyň bahasynyň 52 dollardan geçmejekdigini habar berdi.
